Borgaryfirvöld sýni kæruleysi og dónaskap

Kristín Tómasdóttir, fjög­urra barna móðir og fjöl­skyldumeðferðarfræðing­ur sem hefur staðið fyrir mótmælum vegna leikskólavandans í Reykjavíkurborg, er ekki sátt við kynningu borgaryfirvalda á tillögum þeirra á vandanum. Telur hún borgina þurfa gera betur.

Skúli Helgason, formaður stýrihóps borgarinnar í uppbyggingu leikskóla, kynnti tillögur meirihlutans að leikskólavandanum í Ráðhúsinu í dag. Þá sat Einar Þorsteinsson, formaður borgarráðs, fyrir svörum eftir kynninguna, en hann hafði boðið foreldrum sem mættu á mótmælin í dag á kynninguna.  

Frétt af mbl.is

Borgin kynnir sex tillögur að leikskólavandanum

Skúli kynnti tillögurnar í dag. mbl.is/Hákon

Ekki áhugakona um skipulag leikskóla

Kristín tók til máls að kynningunni lokinni og sakaði borgaryfirvöld um kæruleysi og dónaskap. Sagði hún kynninguna ekki innihalda nein bein svör.

„Við getum ekki farið í vinnuna okkar vegna þess að þið eruð ekki að vinna vinnuna ykkur,“ sagði Kristín.

Jafnframt kom fram í máli Kristínar að hún hefði ekki gaman að því að mæta á kynningar sem þessar, enda væri hún ekki áhugakona um skipulag leikskóla. 

Þá kallaði Kristín eftir því að borgin myndi greiða þeim foreldrum sem væru með börnin sín á biðlista heimgreiðslur. 

Einar sagði meirihlutann vera að skoða þá tillögu, en leggja þyrfti mat á hana. 

Frétt af mbl.is

Ölmusa frá borginni muni ekki duga

• Blogga um frétt