Lukkan lék ekki við landsmenn þegar dregið var út í Eurojackpot í kvöld, eða að minnsta kosti þá sem fest höfðu kaup á miða í von um fyrsta vinning, sem hljóðaði upp á rúmlega 2,3 milljarða íslenskra króna.
Svo fór að vinningurinn kom á miða sem seldur hafði verið í Danmörku.
Fjórir Þjóðverjar skipta auk þess með sér 2. vinningi, og fær hver um sig rúmar 57 milljónir króna fyrir vikið, þó eflaust taki þeir það heldur út í evrum.
Sex til viðbótar skiptu með sér 3. vinningi, andvirði 21,5 milljóna króna fyrir hvern og einn, en þeir heppnu voru sem fyrr allir á meginlandi Evrópu.
Einn Íslendingur hafði samt sem áður fjórar réttar tölur í Jókernum svonefnda, og fær fyrir það hundrað þúsund krónur. Sá miði var seldur í áskrift.