Slökkviliðið á höfuðborgarsvæðinu hefur þurft að fara í þrjú útköll í Vesturbænum og miðbænum það sem af er degi til að dæla vatni upp úr kjöllurum húsa vegna utanaðkomandi vatns. Þetta staðfestir varðstjóri hjá slökkviliðinu í samtali við mbl.is.
Mikið hefur rignt í höfuðborginni í morgun og í þeim tilfellum sem um ræðir hafa niðurföll ekki haft undan vatnselgnum, með þeim afleiðingum að vatn hefur flætt inn í hús við Ægisíðu, Hagamel og á BSÍ.