Næturstrætó hættir akstri

Stjórn Strætó hefur tekið ákvörðun um að hætta akstri næturstrætó um helgar og hefur ákvörðunin þegar tekið gildi. Farþegafjöldi hefur verið undir væntingum og í ljósi fjárhagsstöðu fyrirtækisins telur stjórnin ekki réttlætanlegt að halda áfram akstrinum.

Mun ákvörðunin hafa áhrif á leiðir 101, 102, 103, 104, 105, 106 og 107.

Stjórn Strætó samþykkti í júlí að hefja akstur næturstrætó um helgar til reynslu út septembermánuð. Reynslutímanum er nú lokið og er ljóst að væntingar um farþegafjölda hafa ekki staðist, að því er fram kemur í tilkynningu Strætó. 

Í tilkynningunni segir jafnframt að farþegafjöldi hverrar helgar hafi verið um 300 til 400 og að meðaltali 14 til 16 í hverri ferð, sem er talsvert undir „ásættanlegum viðmiðum.“

„Í ljósi þessa og fjárhagsstöðu Strætó, samþykkti stjórn Strætó að ekki sé réttlætanlegt að halda áfram akstri næturstrætó um helgar nú að loknum reynslutíma og verður því þeirri þjónustu hætt.“

• Blogga um frétt