Innlent | mbl | 5.11.2022 | 20:16 | Uppfært 6.11.2022 16:48

Hussein án húsnæðis og matar í Grikklandi

Myndin er birt með leyfi Hussein Hussein. Samsett mynd

Sema Erla Serdar, stofnandi Solaris, hjálparsamtaka fyrir hælisleitendur og flóttafólk á Íslandi, segir að hluti þeirra hælisleitenda sem voru fluttir af landi brott síðastliðinn fimmtudag séu nú heimilislausir og án matar. Þá gangi stúlkur þær, sem voru í námi við FÁ, ekki í skóla í Aþenu.

Sema segist reyna að halda sambandi við sem flesta en að það sé erfitt þar sem margir þeirra hafi ekki tök á því að hlaða farsímana sína.

Frétt af mbl.is

Ljóst að lögregla þarf að eiga bíl fyrir hjólastóla

Segir að aðgerðirnar hafi verið „mannlegur fraktflutningur“

Tíu samtök, meðal annars Solaris, standa að mótmælum á Austurvelli kl 14 á morgun þar sem aðgerðum ríkisstjórnarinnar síðastliðinn fimmtudag verður mótmælt undir yfirskriftinni „Ekki í okkar nafni“.

Sema gerir ráð fyrir góðri mætingu á morgun.

„Ég geri ráð fyrir því að fullt af fólki muni koma saman áfram til að sýna samstöðu með því fólki sem var flutt með mannlegum fraktflutningi stjórnvalda í vikunni og senda skýr skilaboð um að framferði eins og þetta verði ekki liðið,“ segir Sema í samtali við mbl.is.

Hún kveðst finna fyrir samhug meðal Íslendinga og segir þeim ekki standa á sama um þetta.

„Við erum sem samfélag upp til hópa svekkt, við þurfum líka að vera reið og sýna reiði okkar. Það er tækifæri til þess á morgun. Þetta er ástand sem við höfum horft á stigmagnast.“

Sema Erla Serdar er stjórnmála- og Evrópufræðingur Ljósmynd/ Jón Aðalsteinn Bergsveinsson

Vonast til þess að Íslendingar venjist ekki viðlíka aðgerðum

Sema hefur áhyggjur af því að atvik á borð við aðgerðir lögreglu á fimmtudag verði reglulegir viðburðir sem festi sig í sessi og þannig venjist almenningur þeim.

Sema hefur verið í sérstöku sambandi við Hussein Hussein, sem er fatlaður og bundinn við hjólastól. Hún segir hann ekki hafa fengið nokkurn mat í þrjá daga og að hann búi á götunni. Þá segir Sema þær stúlkur sem stunduðu nám í FÁ ekki fá neina menntun úti í Grikklandi.

Sema segir íslensk yfirvöld hafa sent hælisleitendurnar til Grikklands vitandi af því að aðstæður þeirra yrðu svona.