Bíll varð fyrir aurskriðu nærri Grenivík

Aurskriða féll rétt sunnan við Fagrabæ í Grýtubakkahreppi, sunnan við Grenivík í morgun. 

Sólveig Gísladóttir, sérfræðingur á samskiptadeild Vegagerðarinnar, segir í samtali við mbl.is að starfsmenn Vegagerðarinnar vinni nú að því að loka veginum. 

Bíll var á akstri þegar skriðan féll og varð fyrir skriðunni. Ökumaður bílsins er þó ómeiddur og tilkynnti skriðuna til lögreglu klukkan 5:40. 

Eftirlitsmaður Vegagerðarinnar segist telja að skriðan sé nokkuð stór, en erfitt sé að segja til um það vegna skyggnis. 

Almannavörnum hefur verið gert viðvart. Hjáleið er um Dalsmynni.

Tveir farþegar í bílnum

Uppfært klukkan 7:54

Lögreglan á Norðurlandi eystra greinir frá því að ásamt ökumanni hafi verið tveir farþegar í bílnum, sem hafnaði utan vegar vegna aurskriðunnar. Engan sakaði.

„Lögregla fór á staðinn og lokaði veginum og bjargaði fólkinu til Akureyrar. Skriðan er á veginum skammt sunnan við bæinn Fagrabæ. Það er erfitt að meta umfang skriðunnar í myrkrinu en við fyrstu sýn áætluðu lögreglumenn að hún gæti náð yfir 50-70 metra kafla á veginum og gæti verið allt að meters þykk,“ segir í tilkynningu frá lögreglunni. 

Frá vettvangi í morgun. Ljósmynd/Vegagerðin

• Blogga um frétt