Lögreglan á höfuðborgarsvæðinu leysti í gær upp samkvæmi á Seltjarnarnesi þar sem mikill fjöldi ungs fólks undir tvítugu, á aldrinum 16 til 17 ára, var að skemmta sér og var töluvert mikil ölvun á staðnum, að því er fram kemur í dagbók lögreglu.
Vísir greinir frá því að lögregla hafi verið kölluð á vettvang þar sem að nokkrir grímuklæddir einstaklingar hafi mætt á samkomuna, sem var bjórkvöld menntskælinga á höfuðborgarsvæðinu.
Að sögn vitna voru mennirnir vopnaðir hnífum og töldu þeir sig eiga eitthvað óuppgert við einn menntaskólanemann sem þar var staddur.
Óskað var eftir aðstoð lögreglu og var fjölmennt lið sent á vettvang en samkvæmt Vísi tókst lögreglu að skerast í leikinn áður en til alvarlegra átaka kom.
Uppfært: Vísir hefur nú uppfært frétt sína og í athugasemd ritstjórnar segir að upplýsingar sem Vísir taldi eftir heimildum sínum í fyrri útgáfu fréttarinnar hvað grímur og hnífa varðar hafi reynst rangar.