Helgi Gunnarsson, aðstoðaryfirlögregluþjónn hjá lögreglunni á höfuðborgarsvæðinu, segir að ekkert hafi verið bókað um grímuklædda menn vopnaða hnífum á bjórkvöldi á Seltjarnarnesi í gærkvöldi.
Lögreglan á höfuðborgarsvæðinu leysti í gær upp samkvæmi á Seltjarnarnesinu þar sem mikill fjöldi ungs fólks undir tvítugu, á aldrinum 16 til 17 ára, var að skemmta sér og var töluvert mikil ölvun á staðnum, að því er fram kemur í dagbók lögreglu.
Vísir greindi frá því að nokkrir grímuklæddir eintaklingar hafi mætt á samkomuna vopnaðir hnífum og töldu þeir sig eiga eitthvað óuppgert við einn menntaskólanemann sem þar var staddur. Vísir segist vera með myndband undir höndunum sem sýnir á annan tug lögreglumanna á svæðinu.
Uppfært klukkan 10.20: Vísir hefur nú uppfært frétt sína og í athugasemd ritstjórnar segir að upplýsingar sem Vísir taldi eftir heimildum sínum í fyrri útgáfu fréttarinnar hvað grímur og hnífa varðar, hafi reynst rangar.
„Ég er nú búinn að skoða dagbók lögreglunnar eftir að hafa séð þessa frétt hjá Vísi og hafði samband inn í fangageymslu, varðstjórann þar, og það er bara ekkert skráð. Ég veit ekki hvaðan í ósköpum þessi frétt er komin. Ekki ætla ég mönnum að vera búa til eitthvað,“ segir Helgi.
Hann segir engan vistaðann í fangageymslum sem tengjast þessu atviki og ekkert hafi verið minnst á hnífa tengdum atvikinu.
„Ég er búinn að kanna þetta og lúslas dagbókina frá þessari skemmtun þarna á Seltjarnarnesi og þetta voru bara unglingar að skemmta sér og það fór aðeins úr böndunum eins og gerist og gengur hjá krökkum sem drekka aðeins yfir sig,“ segir Helgi.
Er þetta þá ekkert tengt árásinni á Bankastræti Club?
„Nei nei,“ segir Helgi og endurtekur að þetta hafi einfaldlega verið samkvæmi ungmenna sem hafi verið leyst upp.