Lögregla var kölluð að hóteli í Reykjavík vegna gests sem hafði valdið skemmdum á herbergi. Hann hafði einnig í hótunum við starfsfólk.
Málið er í rannsókn, að því er kemur fram í dagbók lögreglunnar á höfuðborgarsvæðinu þar sem greint er frá því helsta frá klukkan 17 í gær til klukkan 5 í nótt.
Kona var vistuð í fangageymslu eftir umferðaróhapp. Hún er grunuð um akstur undir áhrifum fíkniefna. Engin slys urðu á fólki.
Þrír ökumenn voru handteknir vegna gruns um ölvun við akstur milli klukkan eitt og tvö í nótt og svo annar upp úr klukkan fjögur.
Lögregla var kölluð til vegna rifrildis á milli fólks í umdæmi lögreglunnar í Hafnarfirði og Garðabæ. Ekki var þörf á inngripi lögreglu.
Tilkynnt var um grunsamlegar mannaferðir í umdæminu. Menn voru sagðir taka myndir af húsum en fundust ekki.
Einn var handtekinn í umdæminu eftir uppákomu við öldurhús. Hann var vistaður í fangageymslu, m.a. vegna brots á vopnalögum. Hann var ekki viðræðuhæfur sökum ölvunar.
Maður var handtekinn vegna vímuástands og ónæðis í umdæmi lögreglunnar í Kópavogi og Breiðholti. Hann var vistaður í fangageymslu.