Lögreglunni á höfuðborgarsvæðinu hefur ekki tekist að hafa hendur í hárri fimm karlmanna sem réðust á einn mann í Kópavogi um hálfsjöleytið á laugardagskvöld.
Að sögn Gunnars Hilmarssonar aðalvarðstjóra var um kýting að ræða á milli manna sem höfðu verið á skemmtistaðnum Catalínu. Árásin átti sér stað í Auðbrekku, skammt frá skemmtistaðnum.
Mennirnir voru farnir þegar lögreglan kom á vettvang og segir Gunnar að maðurinn sem var fluttur á slysadeild hafi ekki meiðst alvarlega.
Engin kæra hefur verið lögð fram vegna árásarinnar og reiknar Gunnar ekki með því að málið verði rannsakað frekar af lögreglunni.