Vilja að tapaðir frídagar færist á næsta virka dag

„Jólin 2022 eru andstæðan við brandajól. Almennir launþegar fá aðeins einn lögbundinn frídag alla jólahátíðina. Þar að auki ber gamlársdag upp á laugardag og nýársdag upp á sunnudag,“ segir Björn Leví Gunnarsson.

Hann er flutningsmaður nýs frumvarps Pírata, um að ef lögbundna frídaga beri upp um helgar færist frídagurinn á næsta virkan dag. Björn Leví segir mikilvægt að launþegar fá á hátíðarstundum eins og jólunum nægan frítíma til að verja með fjölskyldu og vinum.

Píratar hafa lagt fram frumvarp sem tryggi lögbundna frídaga. Hér er Björn Leví Gunnarsson, flutningsmaður frumvarpsins, í ræðustól þingsins.

Lífsgæðaaukning í svarta skammdeginu

Í fréttatilkynningu frá Pírötum er einnig haft eftir Birni Leví að trygging ákveðins fjölda lögbundinna frídaga óháð ártali yrði mikil lífsgæðaaukning, ekki síst í svartasta skammdeginu þegar fólki veitir ekki af upplyftingu.

Þá er einnig bent á að rannsóknir hafi sýnt að stytting vinnuvikunnar hafi gefist vel og ánægja og starfsfólks og afköst hafi aukist í kjölfarið.

Samkvæmt lögum um frídaga eru lögbundnir frídagar helgidagar þjóðkirkjunnar, sumardagurinn fyrsti, 1. maí, 17. júní, frídagur verslunarmanna og enn fremur aðfangadagur jóla og gamlársdagur frá klukkan 13.

• 1 blogg um fréttina

Bloggað um fréttina

• Örn Gunnlaugsson: Áunnir frídagar vinnist um næstu helgi.