Hæsta jólaskreytingin á Íslandi

Litríkt og ljósum prýtt fjarskiptamastur Mílu á Hvolsvelli, sem er 45 metra hátt og gnæfir yfir kauptúnið, kemur væntanlega sterkt inn í myndina sem besta jólaskreyting ársins 2022.

„Spíran okkar hér á Hvolsvelli er svipuð og Eiffel-turinn í París, þó hún sé ekki jafnhá. Þetta er líka aðeins minni staður en París þó hér sé svipuð hámenning og hjá þeim í Frakklandi,“ segir Þorsteinn Jónsson á Hvolsvelli. Hann er einn liðsmanna björgunarsveitarinnar Dagrenningar sem nú í vikunni settu jólaseríu í mastrið.