Innlent | mbl | 13.12.2022 | 14:32

„Við höfum beðið eftir þessum degi í fjölmörg ár“

Sigurður Hannesson, framkvæmdastjóri Samtaka iðnaðarins. mbl.is/Eggert Jóhannesson

„Við höfum beðið eftir þessum degi í fjölmörg ár,“ segir Sigurður Hannesson, framkvæmdastjóri Samtaka iðnaðarins, við kynningu á nýju mælaborði Húsnæðis- og mannvirkjastofnunar á íbúðum í byggingu, í dag.

Mælaborðið sýnir í rauntíma hvar íbúðir eru í bygginu um land allt, hvers konar húsnæði og framvindu verkefna. Mælaborðið leysir þannig af hólmi talningu SI.

Hófu talningu af illri nauðsyn

„Það var af illri nauðsyn sem að Samtök iðnaðarins hófu að telja íbúðir í byggingu árið 2010. Við höfum haft það markmið í mörg ár að getað hætt því og síðasta talningin á okkar vegur fór fram og var kynnt fyrr í haust,“ segir Sigurður.

Hann segir Samtök iðnaðarins vera ánægð með vinnuna á bak við mælingarnar.

„Okkur líst mjög vel á það hvernig HMS hefur þróað þetta; þá aðferðafræði sem hefur verið beitt. Þetta fellur algjörlega að hugmyndum iðnaðarins.“

Sigurður segir niðurstöður mælaborðs HMS kallast á við þær talningar sem að SI stóð fyrir. „Aðferðafræðin er svipuð þeirri sem við höfum sjálf beitt. Almennt séð er þetta til bóta fyrir alla, hvort sem að það er almenningur að átta sig á stöðunni, aðilar sem taka ákvarðanir hvort sem það eru sveitarfélög, stjórnvöld, verktakar og aðrir sem standa að uppbyggingu. Vonandi náðum við fram meiri stöðugleika á markaði.“

Samanburður á eplum og appelsínum

Hann bætir við að þrátt fyrir að eftirspurnarhlið húsnæðismarkaðar sveiflist nokkuð sé með þessu móti hægt að hafa áhrif á framboðshliðina „til viðbótar við ýmsar umbætur sem að gerðar hafa verið og er verið að ráðast í að hálfu innviðaráðherra.“

Spurður út í ágreining sem hefur verið á milli SI og annarra hagaðila í gegnum tíðina um talningu segir Sigurður að þrátt fyrir einstaka ágreining hafi samtökin heilt yfir verið sammála sveitarfélögunum. „Við höfum átt gott samstarf við þau og borið saman bækur okkar. Yfirleitt hefur þetta verið samanburður á eplum og appelsínum.“

Ein lóð í boði hjá borginni

Miðað við þau gögn sem að liggja fyrir núna, ertu á þeirri skoðun að það vanti lóðir í Reykjavík?

„Já. Og þá erum við að koma að áhugaverðu umræðuefni. Í skipulagi hefur verið gert ráð fyrir fjölmörgum íbúðum. En síðast þegar ég fór inn á vef Reykjavíkurborgar, sem var nýlega, þá var ein lóð í boði hjá borginni.

Þá erum við að vísa í það að þær lóðir sem heimilt er að byggja á samkvæmt skipulaginu eru að langmestu leyti í eigu einkaaðila. Þeir sömu aðilar ráða því náttúrulega hvenær uppbyggingin fer fram. Það getur verið strax og það getur verið eftir tíu eða tuttugu ár.

Verktakar hafa fjárfest í búnaði og hafa fjölda manns á launaskrá. Þannig að verktakar vilja náttúrulega hafa næg verkefni fyrir fólkið, sitt starfsfólk, til að vinna að nýta þann búnað sem þau hafa fjárfest í. Leiðin til þess er að fá lóðir. Ef að sveitarfélögin geta ekki boðið upp á lóðir, hvaða sveitarfélag sem það er, þá þarf náttúrulega að leita eitthvað annað.“

Spurður hvar tækifærin liggja í frekari skipulagi og úthlutun af hálfu sveitarfélaga á höfuðborgarsvæðinu segir Sigurður Keldnaholtið gott dæmi ásamt Úlfarsárdalnum og Blikastaðarlandið.