Stjórn VR gerir alvarlegar athugasemdir við inngrip ríkissáttasemjara í kjaradeilu Eflingar stéttarfélags og Samtaka atvinnulífsins.
Þetta segir í ályktun á vef VR en stjórnin bætist þar með í hóp fjölda félaga sem hafa gert athugasemd við miðlunartillöguna sem ríkissáttasemjari lagði fram í gær.
„Með því að leggja fram ótímabæra miðlunartillögu hefur ríkissáttasemjari slegið verkfallsvopnið úr höndum stéttarfélags sem hefur þegar hafið atkvæðagreiðslu um boðun aðgerða,“ segir í ályktuninni.
VR skorar því á ríkissáttasemjara að draga tillöguna til baka og virða þannig samningsrétt stéttarfélaga.