Kári Timsson heitir ungur maður sem starfar víða um heim sem tískumódel en þess á milli fer hann með ferðamenn upp á jökla. Kári segir þetta tvennt fara afar vel saman, en oftast vinnur hann eina viku við leiðsögnina og hina er hann á fleygiferð á tískusýningum í París eða Mílanó.
„Ég elska þetta starf. Maður hittir svo margt áhugavert fólk. Ég var fljótlega ráðinn af fimm merkjum,“ segir hann og segist í dag mest vinna fyrir merkið Thom Brown.
„Mig hefði aldrei órað fyrir að ég yrði módel. Mig dreymdi um að verða atvinnumaður í fótbolta þegar ég var drengur, en það varð ekki,“ segir hann og brosir.
„Rauða hárið og bláu augun eru eftirsóknarverð. Það er ótrúlegt að vera hluti af þessum hópi karlmódela. Það eru bara til fimm hundruð í heiminum og ég er einn þeirra. Ég hef farið á tískuvikur karlmanna tvisvar á ári nú í sjö, átta ár,“ segir hann og segist líka fara á tískuvikur kvenna, sem áhorfandi.
„Ég elska tísku, en hafði engan áhuga áður en ég lenti í þessum bransa. Í dag er þetta frekar list en tíska. Hönnuðurinn er að tjá sig í gegnum föt og vill sýna hvað sé mögulegt. En auðvitað eru föt eins og þau sem sjást á tískupöllunum ekki seld í búðum. Mér finnst svo gaman að fá að taka þátt í þessu. Því skrítnara og furðulegra, því betra.“
Nóg hefur verið að gera hjá Kára í módelstörfum, en þó segist hann nú bráðum „of gamall“ fyrir starfið.
„Módelstörfunum fer fækkandi en þegar maður er eins og ég, að nálgast 27 ára, er það í þessum bransa eins og að vera áttræður. Ég er með „gamalt“ andlit. Þessi ferill er mjög stuttur en mögulega kemst maður aftur inn í bransann þegar maður verður kominn yfir miðjan aldur, en það er algengt til dæmis að eldri menn auglýsi úr. En ég er klárlega á endasprettinum núna,“ segir hann, en Kári hefur búið í Mílanó, London, París og Kaupmannahöfn og í Hollandi á síðustu árum.
„Þegar ég byrjaði fór ég út um allan heim, aðra hverja viku, til Evrópu eða Asíu, í alls konar verkefni. Ég hef auglýst mikið af húðvörum. Rauða hárið og föla húðin sló í gegn í Asíu,“ segir hann og segist oft hafa séð myndir af sér á stórum auglýsingaskiltum.
„Það er ofsalega skrítið! Ég hef séð myndir á veggjum í París og á strætisvögnum, aðallega auglýsingar frá Thom Brown. Ég hef líka séð mynd af mér á Times Square, sem var mjög töff, en það er samt alltaf svo skrítið. Hvernig get ég verið þarna?“ segir Kári og nefnir að myndir af honum hafi margoft birst í Vogue og í 10 Men.
Ítarlegt viðtal er við Kára í Sunnudagsblaði Morgunblaðsins um helgina.