Vilhelm Neto skemmtikraftur og Sólveig Anna Jónsdóttir, formaður Eflingar, sameina krafta sína í nýju myndbandi sem Geðhjálp sendi frá sér.
Þar skiptast þau á að þvinga fram hlátur, þar til þau missa stjórn á sér og springa úr hlátri, en hlátur er eitt af G-vítamínunum sem Geðhjálp er í herferð að breiða út um þessar mundir.
Líkt og kunnugt er orðið, hefur Sólveig Anna staðið í ströngu í kjaradeilum við Samtök atvinnulífsins undanfarin misseri, en ríkissáttasemjari steig inn í deiluna á föstudag og lagði fram miðlunartillögu sem hefur fallið í afar misjafnan jarðveg.
Þannig tók hann samningsumboðið raunar af samninganefndunum, og óhætt er að segja að þá hafi Sólveigu Önnu ekki verið hlátur í hug.
Það er þó gott að sjá, og raunar til fyrirmyndar, að Sólveig Anna gleymi ekki gleðinni þegar hún á stund milli stríða.