„Það er allt ónýtt held ég en strákarnir komust út, sem er það sem skiptir máli,“ sagði Gunnar Einarsson íbúi við Hrauntungu í Kópavogi, en eldur kom upp í svefnherbergi í raðhúsaíbúð Gunnars og fjölskyldu um hádegisbilið í dag.
Gunnar vildi annars lítið tjá sig um málið en hann sagðist varla geta hent reiður á hugsunum sínum á þessari stundu. Tveir af þremur sonum Gunnars voru í húsinu en komust út af sjálfsdáðum.
Töluverður eldur var í íbúðinni er slökkvilið bar að garði en greiðlega gekk að slökkva eldinn. Engin slys urðu á fólki og engar skemmdir urðu á nærliggjandi íbúðum. Aðspurður sagðist Gunnar vera með allar tryggingar í lagi.