Urður Egilsdóttir
„Málið er í höndum SA,“ segir Hildur Ómarsdóttir, aðstoðarframkvæmdastjóri Iceland Hotel Collection by Berjaya, í samtali við mbl.is um verkfallsboðun Eflingar og bætir við að þar sé málið í góðum höndum.
Boðunin nær til sjö hótela félagsins en hún nær einnig til The Reykjavík Edition hótelsins. Alls um 500 félagsmenn Eflingar starfa hjá hótelunum átta.
Hildur vildi ekki tjá sig frekar um málið við mbl.is og það sama á við um forsvarsmenn The Reykjavik Edition.
Atkvæðagreiðslurnar hefjast á hádegi á föstudaginn og munu standa til klukkan 18:00 á þriðjudaginn. Verði boðun verkfallanna samþykkt hefst vinnustöðvun á hádegi 15. febrúar og er hún ótímabundin.