Erindi Sólveigar verði svarað af ráðuneytinu
Urður Egilsdóttir
Bréfi Sólveigar Önnu Jónsdóttur, formanns Eflingar, verður svarað af forsætisráðuneytinu. Þetta staðfestir Katrín Jakobsdóttir forsætisráðherra í samtali við mbl.is en hún vildi ekki tjá sig nánar um innihald bréfsins.
Sólveig sendi ráðherra bréf í gær þar sem hún óskaði eftir fundi með Katrínu og að hún deildi með Eflingu „þeirri ráðgjöf sem hún segist hafa fengið frá sérfræðingum um að miðlunartillaga ríkissáttasemjara sé lögleg“.
Vitnaði Sólveig þar í ummæli sem Katrín lét falla í fjölmiðlum um lögmæti miðlunartillögunnar.
„Að sjálfsögðu svörum við bréfinu eins og öllum erindum sem til okkar koma,“ segir Katrín.
Deilumálin endurspegli hversu flókið málið sé
Í gær boðaði Efling frekari verkföll á hótelum í Reykjavík en einnig hjá félagsmönnum sem starfa hjá Samskip, Olíudreifingu og Skeljungi.
Forsvarsmenn þeirra fyrirtækja sögðu í viðtali við mbl.is í gær að verkfall olíubílsstjóra gæti valdið miklu tjóni í samfélaginu.
Katrín segir að ríkisstjórnin hafi ekki rætt þá verkfallsboðun sérstaklega.
„Það eru náttúrulega engin verkföll hafin og eins og fram hefur komið þá er þessi deila mjög hörð,“ segir hún og nefnir að þrjú deilumál eru í gangi varðandi deiluna.
Í fyrsta lagi mál ríkissáttasemjara gegn Eflingu fyrir Héraðsdómi Reykjavíkur vegna vanskila á kjörskrá Eflingar svo að hægt sé að kjósa um miðlunartillögu ríkissáttasemjara.
Í öðru lagi stjórnsýslukæru Eflingar til ráðuneytis vinnumarkaðsmála vegna ákvörðunar ríkissáttasemjara um að leggja fram miðlunartillöguna.
Í þriðja lagi mál Samtaka Atvinnulífsins (SA) gegn Eflingu fyrir Félagsdómi þar sem SA telur boðaða vinnustöðvun Eflingar ólögmæta vegna miðlunartillögunnar.
„Ég held einfaldlega að þetta endurspegli hversu flókin og hörð deilan er.“
Deilan fyrst og fremst á milli Eflingar og SA
Katrín nefnir að stjórnvöld hafi kynnt sínar aðgerðir vegna samninga á almennum vinnumarkaði í desember þegar samningar hluta vinnumarkaðarins lágu fyrir.
„Nú er þessi deila í mjög hörðum hnút en hún er auðvitað fyrst og fremst á milli Eflingar og SA,“ segir hún og bætir við að því sé það ekki hlutverk ríkisstjórnarinnar að leysa úr deilunni.
„Það er mikilvægast að deiluaðilar geti náð saman og auðvitað vonum við – þó að deilur geti oft verið mjög harðar – þá finnast nú stundum lausnir samt,“ segir Katrín og bætir við að lokum að stjórnvöld fylgist þó náið með stöðunni.
