Dómsmálaráðherra hefur ákveðið að framlengja gildistíma 44. gr. útlendingalaga um sameiginlega vernd vegna fjöldaflótta í kjölfar innrásar Rússlands í Úkraínu.
Upphaflega var ákvörðun um virkjun greinarinnar tekin 4. mars í fyrra og gilti til eins ár. Ákvörðun um framlengingu er tekin að undangengnu samráði, innan lands sem utan, þar á meðal við flóttamannastofnun Sameinuðu þjóðanna, að því er segir í tilkynningu.
Átök hafa geisað í Úkraínu um 11 mánaða skeið með tilheyrandi eyðileggingu og skemmdum á borgum, bæjum og innviðum landsins. Þá er óvissan um framhaldið gríðarleg.
Á síðasta ári sóttu 2.350 einstaklingar um tímabundna vernd á grundvelli 44. gr. útlendingalaga hér á landi. Þar af hefur Útlendingastofnun þegar veitt tæplega 2.200 umsækjendum slíka vernd. Einhverjar umsóknir eru enn í vinnslu og lítill hluti umsókna hefur hlotið aðrar lyktir, svo sem vegna þess að þær hafa verið dregnar til baka af hálfu umsækjanda.
Ef horft er til heildarfjölda umsókna um tímabundna vernd árið 2022 er meðaltal umsókna á mánuði 235 frá mars til desemberloka. Ekki verður séð að fjöldi umsækjenda um tímabundna vernd hafi dregist teljanlega saman undanfarna mánuði frá því sem var mánuðina þar á undan, segir í tilkynningunni.