Eitt skilti og tekjulindin fengið forgang

Jó­hann­es Rún­ars­son, fram­kvæmda­stjóri Strætó bs., segir Isavia ekki vilja auglýsa vel í Leifsstöð þá strætóleið sem er í boði frá Keflavíkurflugvelli. Tekjustreymið af flugrútunum, en rekstur þeirra er boðinn út, hafi fengið forgang.

„Þeir eru auðvitað með sína tekjulind þarna í gegnum þessar flugrútur og það hefur fengið þeirra forgang,“ segir Jó­hann­es í samtali við mbl.is.

Leið landsbyggðarstrætó númer 55 stoppar nálægt flugvellinum. Vegagerðin rekur landsbyggðarstrætó með aðstoð Strætó bs.

Árið 2018 fékkst leyfi fyrir því að auglýsa strætóleiðina á flugvellinum. Í kjölfarið var einu skilti komið upp þar sem leiðin er auglýst.

Frétt af mbl.is

Farþegum verður bent á Strætó

Strætisvagnar stöðva handan bílastæðaflæmisins við Leifsstöð. Ljósmynd/Isavia

Skoða þyrfti tíðni og þjónustutíma

mbl.is greindi í gær frá því að Hildur Sverrisdóttir, þingmaður Sjálfstæðisflokksins, hefði innt innviðaráðherra eftir svörum á því hvers vegna almenningssamgöngur að Keflavíkurflugvelli væru ekki betri. Nú annast tvö fyrirtæki akst­ur til og frá flug­vell­in­um, en akst­ur­inn er boðinn út.

Spurði Hildur meðal annars hvort eitthvað stæði í vegi fyrir því að Strætó geti auglýst þjónustu sína innan flugstöðvarinnar.

Frétt af mbl.is

Spyr hvað standi í vegi fyrir Strætó á flugvöllinn

Eins og áður sagði fer leið 55 nálægt flugvellinum. Spurður hvernig hægt væri að fá fleiri til að nýta leiðina segir Jóhannes:

„Ég held að það þyrfti bæði að bæta merkingarnar og helst að hafa þetta alveg við flugvöllinn. Svo þarf auðvitað að skoða tíðnina og þjónustutímann.“

• Blogga um frétt