Forseti Kósóvó, Vjosa Osmani, fundaði hér á landi með Katrínu Jakobsdóttur forsætisráðherra og Þórdísi Kolbrúnu Reykfjörð Gylfadóttur utanríkisráðherra í gær.
Meðal þess sem var rætt var formennska Íslands í Evrópuráðinu, tvíhliðasamskipti á milli Íslands og Kósóvó og staða friðarviðræðna milli Serbíu og Kósovó, að því er fram kemur í tilkynningu Stjórnarráðsins.
Katrín og Þórdís Kolbrún hvöttu Osmani til að leita allra leiða til að ná samkomulagi við nágrannaríki sitt sem allra fyrst.
Kósovó sótti formlega um aðild að Evrópuráðinu í maí 2022 en umsóknin er nú til umfjöllunar í framkvæmdastjórn ráðherranefndar Evrópuráðsins.