Hörður Guðmundsson, eigandi verkfærahússins sem brann við bæinn Ytri-Víðivelli í Fljótsdal í gærkvöldi, segir í samtali við mbl.is að húsið og allt sem var inni í því sé ónýtt og að tjónið sé líklega á milli 20 og 30 milljónir króna.
Áföst hlaða var við verkstæðið og er hún að mestu heil segir Hörður.
Hann kom að eldinum eftir að hafa verið á æfingu fyrir þorrablót í félagsheimilinu Végarði, sem stendur þar nærri, en engum var meint af eldinum.
Hörður segir að vísbendingar bendi til þess að eldurinn hafi kviknað undan viðarkyndara.
Húsið var um fjögur hundruð fermetrar og verður tjónið nú metið af tryggingarfélagi.
Uppfært 5. febrúar
Mbl.is barst ábending frá syni Harðar sem er leigutaki á býlinu og átti verkfæri, tæki og efni inni í húsinu sem brann. Áætlað er að það tjón sé á milli 20 til 30 milljónir króna. Hann greinir frá því að húsið sé brunatryggt af eiganda. Þá átti eigandinn dráttarvél sem var inni í húsinu sem brann.