Innlent | mbl | 8.2.2023 | 11:59

Óskiljanlegar boltalíkingar og viðsnúningur

Halldór Benjamín Þorbergsson, framkvæmdastjóri SA. mbl.is/Eggert Jóhannesson

Samtök atvinnulífsins lýsa yfir vonbrigðum með yfirlýsingu peningastefnu Seðlabankans sem birt var í morgun. Þetta segir Halldór Benjamín Þorbergsson, framkvæmdastjóri SA.

Frétt af mbl.is

Stýrivextir hækkaðir um 0,5 prósentustig

Hann segir hækkanir vaxta er skiljanlegar þar sem verðbólga hefur reynst þrálát, „en þar sem stutt er í næsta fund hefði verið réttara að halda sig við minni hækkanir líkt og við síðustu vaxtaákvarðanir.“

Peningastefnunefnd Seðlabankans gagnrýndi nokkuð hækkanir á nýundirrituðum kjarasamningum á almennum vinnumarkaði.

Gerir alvarlegar athugasemdir við viðsnúning

Halldór segir það koma mjög á óvart og að SA gera alvarlegar athugasemdir við er að Seðlabankinn hefur algjörlega snúist í viðhorfi sínu gagnvart nýjum kjarasamningum.

„Seðlabankastjóri lét hafa eftir sér að þeir væru „mjög góð tíðindi“ sem er í engu samræmi við mat bankans og peningastefnunefndar nú. Rétt er að minnast á að við síðustu vaxtaákvörðun var einnig algjör viðsnúningur í skilaboðum bankans, sem hafði áður gefið í skyn hlé á vaxtahækkunum og sagt skýrt að boltinn væri hjá vinnumarkaðnum.“

Frétt af mbl.is

Sjálfsmark vinnumarkaðarins og hins opinbera

Á leið að skaða trúverðugleika

„Seðlabankinn er því því miður að feta hratt þá leið að skaða trúverðugleika sinn alvarlega. Almenningur og allir haghafar eiga rétt á að skilaboð bankans um ákvarðanir sem skipta líf okkar öll máli séu skýr. Slíkt hefur ekki verið uppi á teningnum síðustu mánuði og óskiljanlegar boltasamlíkingar hafa verið skýrt dæmi um þetta. Það er krafa SA að bankinn geri miklu betur í samskiptum út á við.“

Opinberi markaðurinn líti í eigin barm

Halldór segir skiljanlegt að Seðlabankinn hafi áhyggjur af þróuninni og undirliggjandi verðbólguþrýstingi.

„Hvað sem líður viðsnúningi í skilaboðum getur vinnumarkaðurinn ekki hunsað spá og greiningu Seðlabankans. Ljóst er að ekki verður gengið lengra í launahækkunum án þess að framkalla frekara viðbragð af hálfu Seðlabankans. Þar þarf opinberi markaðurinn, sem hefur ítrekað farið fram úr þeim almenna í launahækkunum síðustu misseri, sérstaklega að líta í eigin barm. Það er verulegt áhyggjuefni að sjá fram á versnandi viðskiptakjör og lítinn framleiðnivöxt á tímum mikilla launahækkana. Slík þróun er uppskrift að viðvarandi og vaxandi verðbólgu. Alþingi þarf jafnframt að líta í eigin barm því að ljóst er að fjárlög 2023 gera lítið sem ekkert til að sporna gegn verðbólgu.“