Nokkuð mjótt var á munum í kosningu gjaldkera og ritara VG í gær. Innan við eitt prósent kjósenda skilaði auðu um embætti formanns þar sem Katrín Jakobsdóttir var ein í framboði.
Eins og mbl.is greindi frá í gær voru þau Jana Salóme Ingibjargar Jósepsdóttir og Steinar Harðarson kjörin í embætti ritara og gjaldkera af landsfundi.
Jana Salóme var kjörin með 57,6% greiddra atkvæða en mótframbjóðandi hennar, Sigríður Gísladóttir, hlaut 41.8% kosningu.
Líf Magneudóttir bauð sig fram gegn Steinari Harðarsyni en hlaut 40,9% kosningu gegn 54,7%. 4,4 skiluðu auðu.
Þetta kemur fram í uppfærðri tilkynningu á vef Vinstri grænna. 185 manns voru á kjörskrá og meginþorri þeirra greiddi atkvæði á fundinum í gær.
Katrín Jakobsdóttir og Guðmundur Ingi Guðbrandsson voru ein í framboði til embættis formanns og varaformanns. 2,5% skiluðu auðu í stað þess að kjósa Guðmund og 0,7% í tilfelli formanns.
Í kjöri til meðstjórnar greiddu 85,2% Elínu Björku Jónsdóttur atkvæði. Næst á eftir komu Maarit Kaipainen með 74,1%, Pétur Heimisson 73,5%, Sigríður Gísladóttir 72,8%, Óli Halldórsson 61,7%, Hólmfríður Árnadóttir 61,7% og Andrés Skúlason með rétt ríflega helming, 55,6%.