Stjórn ÍKSA tekur gagnrýni á kynjahalla til greina

Stjórn Íslensku kvikmynda- og sjónvarpsakademíunnar (ÍKSA) hefur sent frá sér tilkynningu vegna gagnrýni Fé­lags kvenna í kvik­mynd­um, sem lýs­ti á dögunum yfir von­brigðum með kynja­hlut­fall í val­nefnd­um Eddu­verðlaun­anna í ár.

Í tilkynningunni tekur stjórn ÍKSA til greina gagnrýni hvað kynjahalla í valnefndum varðar árið 2023. Segir stjórnin að konur í valnefndum í ár hafi verið 14 en karlar 24 talsins þrátt fyrir að upphafleg mönnun valnefnda hafi verið með jöfnum kynjahlutföllum.

Frétt af mbl.is

Karlar í miklum meirihluta í valnefndum Eddunnar

„Við mönnun valnefnda horfir stjórn ÍKSA samkvæmt starfsreglum til faglegrar þekkingar, kynjahlutfalls og að viðkomandi sé ekki með innsent verk í þeim flokki sem valnefnd mun skoða. Þá má viðkomandi ekki hafa persónuleg tengsl við þá sem eru tilnefndir. Reynt er að manna nefndirnar þannig að fólk sitji ekki lengur en í 2-3 ár í senn.

Þegar verið er að manna valnefndir er valnefndafulltrúum gert að fara yfir vinnureglur valnefnda og innsend verk í sínum flokki og staðfesta að ekki sé um persónuleg tengsl að ræða. Á þeim knappa tíma sem líður frá því að innsendingar liggja fyrir og þar til valnefndir hefja störf verða oft breytingar á valnefndum, bæði vegna persónulegra tengsla og einnig vegna tímaskorts mögulegra valnefndafulltrúa. Á lokaspretti þessarar vinnu í ár fór því miður svo að kynjahlutfall raskaðist töluvert, mun meira en stjórn hefði kosið,“ segir í tilkynningu stjórnar ÍKSA.

Hlín Jóhannesdóttir er formaður stjórnar Íslensku kvikmynda- og sjónvarpsakademíunnar. Ljósmynd/Aðsend

Kynjahlutföll valnefnda síðustu ára:

2023 sátu 14 konur og 24 karlar í valnefndum.
2022 sátu 23 konur og 17 karlar í valnefndum.
2021 sátu 22 konur og 15 karlar í valnefndum.
2020 sátu 23 konur og 15 karlar í valnefndum.

Alls 153 valnefndafulltrúar, þar af 82 konur eða 54 prósent og 71 karl eða 46 prósent.

Þá segir í tilkynningunni að rýnivinna standi yfir hvað starfsreglur og umgjörð Edduverðlaunanna varðar þar sem fyrirkomulag á mönnun valnefnda er meðal þess sem verið er að skoða. Fulltrúi Fé­lags kvenna í kvik­mynd­um hefur verið boðuð á fund rýnihóps til að fara betur yfir málið, eins og segir í tilkynningunni.

• Blogga um frétt