Unnið er að því að endurskoða fyrirkomulag styrkveitinga ríkisins til skákhreyfingarinnar.
Að ósk Ásmundar Einars Daðasonar, sem fer með menntamál í ríkisstjórninni, hefur Skáksamband Íslands mótað heildstæðar tillögur á þessu sviði og liggja þær nú fyrir í stórum dráttum.
Núverandi stuðningur stjórnvalda er í höfuðatriðum þríþættur. Í fyrsta lagi árlegt framlag til Launasjóðs stórmeistara til að fremstu skákmenn þjóðarinnar geti helgað sig skáklistinni, rúmar 33 milljónir króna.
Í öðru lagi framlag til Skákskóla Íslands sem nam um 11 milljónum króna í fyrra.
Loks rekstrarframlag til Skáksambandsins sem í fyrra nam tæpum 27 milljónum króna.
Samanlagt eru þetta rúmar 70 milljónir króna úr ríkiskassanum. Þessu til viðbótar nýtur Skáksambandið stundum sérstakra styrkja vegna einstakra viðburða.
Nánari umfjöllun er að finna í Morgunblaðinu í gær.