Innlent | mbl | 27.3.2023 | 14:06

Féllu úr að minnsta kosti þremur giljum

Grófar útlínur snjóflóðanna sem féllu í morgun miðað við upplýsingar Veðurstofunnar sem liggja fyrir núna. Kort/Veðurstofa Íslands

Snjóflóðin í Neskaupstað í morgun féllu úr að minnsta kosti þremur giljum fyrir ofan byggðina.

Snjóflóð úr Miðstrandarskarði og/eða Klofagili féll skammt innan þéttbýlisins. Þar rann flóðið meðfram leiðigarði og út í sjó, að því er Veðurstofa Íslands greinir frá.

Frétt af mbl.is

Aðgerðir hófust 10-15 mínútum eftir snjóflóð

Þá féll snjóflóð úr Nesgili, utarlega í bænum, á nokkur íbúðarhús við göturnar Starmýri og Hrafnsmýri. Fólk sem var statt í þessum húsum bjargaðist án alvarlegra meiðsla.

Snjóflóð úr Bakkagili, sem er næsta gil utan við Nesgil, stöðvaðist skammt ofan byggðarinnar við Gauksmýri.

Frá Neskaupstað. Ljósmynd/Landsbjörg

Íbúðarhús og atvinnuhúsnæði rýmd

Eftir að flóðin féllu voru mörg hús rýmd undir Nes- og Bakkagiljum, og einnig atvinnuhúsnæði á snjóflóðahættusvæðum innan þéttbýlisins. Í öryggisskyni voru jafnframt öll hús í efstu húsaröðum undir varnargörðum í Neskaupstað rýmd. Það er jafnan gert í alvarlegum snjóflóðahrinum þar sem varnargarðar hafa verið reistir.

Hús voru einnig rýmd á Seyðisfirði en engar fréttir hafa borist af snjóflóðum þaðan.

Frétt af mbl.is

Rýming gildi út nóttina

Minnkandi úrkoma í dag

Spáð er minnkandi úrkomu í dag og norðaustanátt og ætti að vera orðið úrkomulaust í kvöld. Óvíst er á þessu stigi hversu lengi rýmingin verður í gildi.

„Ekki hefur sést til hlíðarinnar milli flóðanna en líklegt er að einhver flóð hafi einnig fallið þar. Stoðvirki hafa verið reist í hluta upptakasvæða í Tröllagiljum og Drangagili, en flóð kunna að hafa fallið í hlíðinni neðan stoðvirkjanna og í giljunum sjálfum þar sem ekki eru stoðvirki,“ segir í tilkynningunni.

Frétt af mbl.is

Yfir 200 manns hafa leitað á fjöldahjálparstöð

„Á næstu dögum verða ummerki snjóflóða í hlíðinni könnuð til þess að afla upplýsinga um snjóflóð sem kunna að hafa fallið ofan varnargarða og kanna aðstæður í upptaksvæðum hlíðarinnar. Einnig verða könnuð ummerki snjóflóðsins sem leiðigarður innan við þéttbýlið beindi til sjávar til þess að athuga hversu hátt það rann upp á garðinn,“ segir þar einnig.

Ljósmynd/Landsbjörg

Fleiri varnarvirki reist á næstu árum

Varnarvirki hafa verið reist í Neskaupstað fyrir byggðina neðan hættulegustu snjóflóðafarvega hlíðarinnar, þ.e. neðan Tröllagilja og Drangagils, og einnig neðan Urðarbotns sem er þar á milli.