Áhugasamur um nasisma og kommúnisma
Setja bókamerki
Geðlæknir sem kom að máli Magnúsar Arons Magnússonar, sem ákærður er fyrir að hafa orðið Gylfa Bergmann Heimissyni að bana í Barðavogi í júní á síðasta ári, segir Magnús hafa haft mikinn áhuga á seinni heimstyrjöldinni, kommúnisma og nasisma.
Segir hann að úr samtölum sínum við hann og fjölskyldu hans hafa greint áhuga á bæði kynþáttafordómum og kvenfyrirlitningu.
Tómas Zoëga geðlæknir gaf skýrslu í Barðavogsmálinu svokallaða í Héraðsdómi Reykjavíkur í dag.
Rekinn úr unglingavinnunni
Tómas hitti ákærða fyrst 6. júní, tveimur dögum eftir að atvikið átti sér stað, og kom svo síðar einnig að geðmati á ákærða.
Í samantekt um greinargerð sína um ákærða segir Tómas að Magnús hafi verið sérkennilegur í háttum og strax minnt hann á einstakling með einhverfu. Í sögu hans hafi komið fram að hann hafi hitt sálfræðing á vegum félagsþjónustunnar þegar hann var tólf ára. Sálfræðingurinn mat það svo að Magnús þyrfti á frekari aðstoð að halda og mælti með að hann myndi sækja hana hjá Barna- og unglingageðdeild Landspítala.
Faðir ákærða hafi komið í veg fyrir það. Á unglingsárum Magnúsar hefðu foreldrar hans skilið og átt í heiftúðlegum deilum um forræði yfir honum.
Þegar hann var í unglingavinnu hafi hann lent upp á kant og verið rekinn þaðan. Hann hafi ekki stundað vinnu síðan. Tómas segir samskipti Magnúsar hafa verið óeðlileg, sérstaklega á seinni hluta grunnskólagöngunnar.
Hann sé bærilega vel greindur og hafi gengið vel í skóla framan af grunnskóla, þó ekki hafi hann eignast vini.
Vantað töluvert upp á eðlilegt líf
Í viðtölum við ákærða hafi alltaf verið tveir til þrír fangaverðir til taks því hann upplifði sig ekki öruggann í návist hans. „Það var óþægilegt að tala við hann. Hann var hálfógnandi. Kom með sérkennileg komment, en ekki tengd ranghugmyndum eða slíku,“ sagði Tómas.
Hann sagði vanta töluvert upp á að Magnús lifði eðlilegu lífi. Hann byggi heima hjá móður sinni, en að þau töluðust lítið við. Magnús væri vakandi á nóttunni og gengi um borgina á nóttunni.
Hann ætti enga vini, nema tvo tölvuvini búsetta í Bandaríkjunum og Kanada. Þá væri hann tortrygginn að eðlisfari, en hvorki með alvarlegar paranojuhugmyndir á grunni geðrofshugmynda né með ranghugmyndir.
„Hann var upptekinn af kommúnisma, nasisma, kynþáttafordómum sem fór dálítið út í öfgar,“ sagði Tómas.
Miður að Magnús hafi ekki fengið hjálp
Hann sagði miður að Magnús hefði ekki fengið aðstoð sem barn, og á unglingsárum hefði honum ekki heldur verið veitt aðstoð og í raun komið í veg fyrir slíkt. Hann benti einnig á að Magnús hefði á seinni árum ekki sóst sjálfur eftir því. Sennilega hafi hann ekki haft innsýn inn í eigin vandamál eða áttað sig á að hann glímdi við vanda.
Spurður af hverju Magnús hefði brugðist við eins og hann gerði kvöldið örlagaríka í júní 2022 sagð hann líklegt að eitthvað hefði raskað ró Magnúsar, líklegast að móðir hans væri ekki heima.
Móðir hans hafði fengið hjartaáfall tveimur dögum áður og var lögð inn á spítala. Þar lá hún og var í aðgerð þegar atvikið átti sér stað. Magnús hafi ekki verið vanur að vera einn heima, og ekki svo lengi. Hann hafi því mögulega verið kvíðinn og stressaður.
Veiting hvalveiðileyfis ekki brot á EES-samningi
Banna mengandi búnað sem leyfður er á Íslandi
Handteknir eftir myndatöku í Vesturbæjarlaug
Vélsleðaslys: Þyrlan kölluð út á mesta forgangi
Árshátíð ríkislögreglustjóra haldin í Tékklandi
Eyjafjarðarbraut lokað vegna alvarlegs umferðarslyss