Móðir fæddi barn sitt utandyra núna í morgun á meðan það var verið að fylgja henni út í sjúkrabíl sem stóð fyrir utan heimili hennar.
Móður og barni heilsast „ljómandi“ vel en þetta kemur fram í tilkynningu frá Slökkviliði höfuðborgarsvæðisins á Facebook-síðu þeirra.
Sjúkrabíllinn var kallaður út í fæðingu í heimahúsi fyrir klukkan sjö í morgun og átti að flytja móðurina á Landspítalann í sjúkrabílnum. Fór svo að móðirin fæddi skyndilega á leið út í bílinn.
„Alveg ný upplifun fyrir okkar fólk! Móður og barni heilsast ljómandi vel, þau voru flutt á fæðingardeild Landspítala til skoðunar,“ kemur fram í tilkynningu slökkviliðsins.