„Þetta er algjör steik“

Mesti hiti landsins á árinu til þessa mældist á Hallormsstað í dag. Mikill hiti hefur sömuleiðis mælst á Egilsstöðum og á Kirkjubæjarklaustri.

„Þetta er algjör steik,“ segir Sigurður Aðalsteinsson, fréttaritari Morgunblaðsins og mbl.is, um veðrið fyrir austan. Hann er við vinnu á Seyðisfirði og segist ánægður með að fá smá golu frá sjónum.

Frétt af mbl.is

Hæsta hitastigið til þessa

Tjaldstæðið viðbúið öllu

„Við trúum ekki öðru en að við fáum frábært sumar,“ segir Heiður Vigfúsdóttir, sem rekur tjaldstæðið á Egilsstöðum. Tjaldstæðið sé búið undir mikinn áhuga ferðamanna og hafi hlotið vilyrði bæjarins fyrir stækkun á svæðinu, verði mjög mikil aðsókn.

„Erlendi ferðahópurinn ferðast ekki eftir veðri heldur er stöðugur. Hins vegar kemur alltaf kippur í fjölda íslenskra ferðamanna þegar spáin er góð,“ segir Heiður, spurð hvort áhugi hafi aukist meðal ferðamanna á að ferðast til Egilsstaða vegna veðursins.

Heiður segir tjaldstæðið einnig vera í stakk búið, muni rigna mikið í sumar.

Ákveðin svæði á tjaldstæðinu hafi mottur til að koma í veg fyrir að drullusvað myndist en það heldur einnig grasinu fínu, verði mikið þurrviðri.

Frétt af mbl.is

Nærri 23 gráða hiti mælist

„Það eru allir að bráðna hérna í hitanum“

„Komdu bara og taktu viðtal við mig hérna fyrir austan,“ segir Guðmundur Birkir Jóhannsson, forstöðumaður sundlaugar Egilsstaða, kíminn í samtali við blaðamann mbl.is þegar blíðviðrið berst í tal.

Spurður hvernig brugðist sé við blíðviðrinu í sundlauginni segir hann að starfsmönnum á vakt sé fjölgað vegna öryggis.

„Við erum búin að henda út sólbekkjum, borðum og stólum fyrir gesti. Það eru bara allir að bráðna hérna í hitanum,“ segir Guðmundur.

Sundlaugin sé nýopnuð eftir framkvæmdir og tilbúin að taka á móti sólþyrstum ferðamönnum.

• Blogga um frétt