Efling íslenskuhæfni starfsfólks í skólum

Starfstengt íslenskunám fyrir innflytjendur samhliða vinnu, bætt gæði íslenskukennslu fyrir innflytjendur, innleiðing rafrænna stöðuprófa í íslensku og efling íslenskuhæfni starfsfólks í leik- og grunnskólum. 

Þetta eru meðal lykilaðgerða í áætlun um málefni íslenskrar tungu sem ráðherranefnd hefur skilað af sér og er nú til kynningar og umsagnar í Samráðsgátt.

Áætlunin inniheldur átján aðgerðir og er markmið þeirra að forgangsraða verkefnum stjórnvalda árin 2023-2026 þegar kemur að verndun og þróun tungumálsins. Greint er frá þessu í tilkynningu Stjórnarráðsins.

Efla samráð og samstarf

Nefndin var sett á laggirnar í nóvember á síðasta ári og er hlutverk hennar að efla samráð og samstarf milli ráðuneyta um málefni íslenskrar tungu og tryggja samhæfingu þar sem málefni skarast.

Forsætisráðherra, menningar- og viðskiptaráðherra, mennta- og barnamálaráðherra, félags- og vinnumarkaðsráðherra og háskóla-, iðnaðar- og nýsköpunarráðherra eiga fast sæti í nefndinni.

Meðal lykilaðgerða í áætluninni eru:

• Starfstengt íslenskunám fyrir innflytjendur samhliða vinnu.
• Bætt gæði íslenskukennslu fyrir innflytjendur.
• Innleiðing rafrænna stöðuprófa í íslensku.
• Sameiginlegt fjarnám í hagnýtri íslensku sem öðru máli.
• Íslenska handa öllum - gerðar verði kröfur um að innflytjendur öðlist grunnfærni í íslensku og hvatar til þess efldir.
• Efling íslenskuhæfni starfsfólks í leik- og grunnskólum og frístundastarfi.
• Vefgátt fyrir miðlun rafræns námsefnis fyrir öll skólastig.
• Samræmt verklag um móttöku, kennslu og þjónustu við börn með fjölbreyttan tungumála- og menningarbakgrunn með sérstakri áherslu á íslensku sem annað mál.
• Reglulegar mælingar á viðhorfi til tungumálsins.

• Blogga um frétt