Sorpa biðst afsökunar á sínum þætti í að hafa ekki miðlað með skýrari hætti hver afdrif drykkjarferna, sem íbúar á höfuðborgarsvæðinu flokka, eru. Ekki hefur náðst árangur við að endurvinna fernurnar en Sorpa biðlar til almennings að halda áfram að flokka fernur.
Í tilkynningu frá Sorpu segir að Sorpa hafi fengið það staðfest hjá endurvinnsluaðila sínum í Hollandi, Smurfit Kappa, að fernur sem flokkaðar hafa verið með pappír séu ekki endurunnar heldur endurnýttar í orkuvinnslu.
Sorpa ítrekar hins vegar að þrátt fyrir þetta nái þau um 92% árangri í endurvinnslu á pappír.
Smurfit Kappa hefur tekið á móti endurvinnanlegum pappírsfernum frá Sorpu síðan á miðju síðasta ári, en í tilkynningu Sorpu segir að engum árangri hafi verið náð í endurvinnslu á fernunum.
Samkvæmt Smurfit Kappa rýra fernurnar endurvinnslu þess pappírs sem flokkaður er með fernunum og því mikilvægt að ná þeim úr pappírsstraumnum. Þær fara því allar í endurnýtingarfarveg, það er í brennslu til orkuframleiðslu.
Í tilkynningu Sorpu segir að framkvæmdastjóra hafi verið falið það verkefni að gera endurbætur á ferlinu og senda pappírinn í flokkun hjá Stena Recycling í Svíþjóð. Þar verði Tetra Pak umbúðirnar flokkaðar frá öðrum pappír og pappa frá Sorpu og komið í betri farveg en nú er. Gert er ráð fyrir árlegum kostnaði upp á 75 milljónir króna.
Sorpa biðlar til almennings að halda endurvinnslu áfram að óbreyttu, og flokka fernurnar með öðrum pappír, annars verði þær urðaðar á urðunarstað Sorpu í Álfsnesi.
Einnig hvetur Sorpa framleiðendur til að vanda val sitt á umbúðum og forðast samsettar umbúðir sem erfitt er að endurvinna, ásamt því að endurskoða upplýsingar um endurvinnslumöguleika á umbúðunum.