Heildarkostnaðaráætlun byggingar nýs Landspítala við Hringbraut hljóðar upp á 210 milljarða króna. Þetta kemur fram í svari Bjarna Benediktssonar fjármálaráðherra við fyrirspurn Sigmundar Davíðs Gunnlaugssonar Miðflokksþingmanns.
Svo hljóðaði fyrirspurnin: „Hver er áætlaður heildarkostnaður við áformaðar framkvæmdir við Landspítala við Hringbraut?“
Í svari sínu bendir fjármálaráðherra á að allar kostnaðartölur í svari hans séu á verðlagi októbermánaðar síðasta árs. Tekur hann enn fremur fram að nánari umfjöllun um byggingu nýs Landspítala sé að finna í rammagrein í fjármálaáætlun fyrir árabilið 2024 til 2028 og í skýrslu stýrihóps um verkefni nýs Landspítala sem út kom í mars.