Stytting biðlista gengur hægt

Sigurður Helgi Helgason forstjóri Sjúkratrygginga segir þetta nokkuð undir væntingum um fjölda aðgerða.

„Það vekur nokkrar áhyggjur hversu fáir hafa brugðist við skilaboðunum á Heilsuveru,“ segir Sigurður Helgi og hvetur fólk sem bíður eftir aðgerð til að svara skilaboðum í gegnum Heilsuveru.

250 af 900 svöruðu

Í kjölfar samningsins í mars sl. var ákveðið að nýta Heilsuveru til að bjóða fólki aðgerðir. Voru skilaboð send á nærri 900 manns. Aðeins um 250 manns hafa svarað þeim skilaboðum. Af þeim hópi þáðu einungis 83 boð um aðgerð hjá fyrrnefndum fyrirtækjum, 66 völdu að vera áfram á biðlista þeirrar stofnunar sem þeir voru þegar á.

Umtalsverður hópur, eða 76 manns, hafði þegar farið í aðgerð og 22 áttu bókaðan tíma í liðskiptaaðgerð hjá öðrum hvorum samningsaðilanum.

Markmiðið með samningi Sjúkratrygginga við Klíníkina og Cosan var að stytta langa biðlista en margir höfðu beðið lengi eftir því að komast í slíka aðgerð eða neyðst til að ferðast út fyrir landsteinana til að stytta sér biðina með ærnum tilkostnaði og fyrirhöfn.

Stefnt var að því að útrýma biðlistum á fáeinum mánuðum með því að auka afkastagetu heilbrigðiskerfisins hér heima en margir héldu til Svíþjóðar í liðskiptaaðgerðir og fylgdu þeim jafnan íslenskir læknar sem framkvæmdu aðgerðirnar á erlendri grundu.

Nánari umfjöllun er að finna í Morgunblaðinu í dag