Hagræðingar ríkisins megi ekki bitna á stúdentum

Landssamtök íslenskra stúdenta (LÍS) brýna fyrir stjórnvöldum að taka þurfi mark á stúdentum við hugsanlegar sameiningar háskólanna. Nú liggur mögulega fyrir að sameina Há­skól­ann á Hól­um við Háskóla Íslands annars vegar og Háskólann á Akureyri við Háskólann á Bifröst hins vegar.

Rektor Há­skóla Íslands, rektor Há­skól­ans á Hól­um og Áslaug Arna Sig­ur­björns­dótt­ir Há­skóla-, iðnaðar-, og ný­sköp­un­ar­ráðherra skrifuðu und­ir vilja­yf­ir­lýs­ingu um aukið sam­starf eða mögu­lega sam­ein­ingu skól­anna tveggja.

Einnig hefur verið greint frá því í Morgunblaðinu að Há­skól­inn á Hól­um og Há­skól­inn á Bif­röst hafi átt í óform­leg­um viðræðum um náið sam­starf. Rektorar HA og Háskólans á Bifröst hafa einnig átt í óformlegum viðræðum um sameiningu.

Frétt af mbl.is

Horfa til sameiningar HÍ og Háskólans á Hólum

Hagur nemenda ekki hafður að leiðarljósi

Af tilefni hugsanlegra sameininga er sendi LÍS frá sér tilkynningu þar sem segir að samtökin segja að í allri umræðu um samstarf og sameiningu háskóla þurfi að tryggja fullt samráð við stúdenta. „Enn fremur þarf að tryggja að allt samstarf sé gert með hag nemenda að leiðarljósi,“ segir í tilkynningunni.

LÍS telja að markmið með mögulegri sameiningu þurfi að vera skýr og að stjórnvöld þurfi að sýna fram á með óyggjandi hætti að markmið sameiningar sé að auka gæði náms, tryggja aðgengi stúdenta að stoðþjónustu og bæta aðgengi að námi.

Frétt af mbl.is

Fagna auknu samstarfi háskólanna

Sameining ekki fýsileg lausn á heimatilbúnum vanda

„Það er ekki launungarmál að hver hinna 7 háskóla á Íslandi hefur verið fjársveltur um langt skeið,“ segir í tilkynningunni auk þess sem að Ísland sé eftirbátur samanburðarþjóða sinna þegar kemur að fjárfestingu í háskólamenntun.

LÍS segir að langvarandi fjársvelti háskólanna sé afleiðing af stefnu stjórnvalda í menntamálum og vísa samtökin því á bug að sameining háskóla sé fýsileg lausn á „hinum heimatilbúna vanda sem fjársveltið er“.

„Hagræðing í ríkisrekstri má ekki vera forsenda fyrir jafn afdrifaríkum aðgerðum og þessar yrðu, taka þarf á menntamálum af meiri festu en svo.“

Engin greining gerð fyrir ákvörðun

Að lokum kemur fram að það skjóti skökku við að ekki hafi verið gerð greining á þeim kostum og göllum sem hljótast af því að hafa sjö starfandi háskóla á landinu. Slík greining hefði þá átt að fara fram áður en hvatt var til sameiningar.

„Hver hinna sjö háskóla á Íslandi hefur sína sérstöðu og ekki má vanmeta þá kosti sem það leiðir af sér. Þar má helst nefna fjölbreytni í námi og hvernig dregið hefur verið úr einsleitni í háskólakerfinu með stofnun nýrra háskóla.“

• Blogga um frétt