Talið gerast aðeins einu sinni á öld
Setja bókamerki
Gríðarlegt úrhelli gerði í Neskaupstað í gærdag. Frá klukkan 13 til 18 mældist úrkomuákefðin samfellt yfir 10 mm á klst. Það jafngildir því að hellt væri úr meira en 10 mjólkurfernum á hvern fermetra lands á hverri klukkustund.
Um þetta fjallar Einar Sveinbjörnsson, veðurfræðingur á Bliku og Veðurvaktinni.
Í samtali við mbl.is segir hann að úrkoman hafi mælst 116,2 mm frá hádegi til miðnættis.
Spár gerðu ekki ráð fyrir úrkomunni
Í greiningu Veðurstofu Íslands um endurkomutíma úrkomu sem Einar hefur áður vitnað til má sjá að 12 klukkustunda samanlögð úrkoma með 100 ára endurkomutíma er 104 mm fyrir Neskaupstað.
Segir Einar í færslu sinni að hvergi hafi rignt meira í gær en einmitt þar eða sem nemur 171 millimetrum.
Sólarhringsúrkomuna segir hann einnig yfir 100 ára markgildinu sem og 48 klukkustunda úrkomuna þar sem í fyrradag mældust 108 millimetrar.
Einar segir í samtali við mbl.is að spár hafi í raun og veru ekki gert ráð fyrir að rigningin yrði slík í Neskaupstað. Frekar hafi verið horft norðar á Austfirði eða til Seyðisfjarðar og Loðmundarfjarðar.
„Það er ekki gott að sjá fyrir hvar úrkoman kemur niður. Jafnvel ekki innan sama fjarðar eða jafnvel milli bæjarhluta.“
Einu sinni á hverjum 100 árum
100 ára markgildið segir Einar að mæli sjaldgæfleika úrkomuákefðar sem þýðir á mannamáli að á 12 klukkustunda tímabili gerist það einu sinni á hverjum 100 árum að jafnaði að úrkoman nái því markgildi.
Byggir markgildið á gögnum frá árunum 1979 til 2017 þar sem skoðuð er dreifing úrkomugilda og svo notaðar þekktar aðferðir til að framreikna þá dreifingu og áætla markgildið.
