B fær að halda dyrunum opnum
Setja bókamerki
Uppákoman á skemmtistaðnum B við Bankastræti aðfaranótt sunnudags mun ekki hafa áhrif á starfsemina þessa helgi, að sögn Sverris Einars Eiríkssonar, annars eigenda staðarins.
„Opið um helgina og áframhaldandi fjör,“ segir hann í samtali við mbl.is.
Eins og greint var frá á mbl.is fyrr í vikunni var Sverrir Einar handtekinn aðfaranótt sunnudags við eftirlit lögreglu á B. Sverrir Einar sendi í kjölfarið formlega kvörtun vegna vinnubragða lögreglunnar, sem hann segir ekki hafa gætt meðalhófs.
Samkvæmt heimildum mbl.is voru ungmenni, sem ekki höfðu náð 20 ára aldri, inni á staðnum og voru dæmi um að einhver þeirra hefðu greitt sérstaklega fyrir inngöngu.
/frimg/1/43/97/1439705.jpg)
Hefur ekki áhrif á rekstrarleyfi
Í samtali við mbl.is leggur Sverrir Einar ríka áherslu á að fulltrúar skemmtistaðarins vilji eiga í góðu samstarfi við lögregluna og að hann vilji ekki að uppákoman síðustu helgi komi í veg fyrir það.
Sveinn Andri Sveinsson, lögfræðingur Sverris Einars, segir að lögreglan hafi heimild til þess að sekta skemmtistaðinn en að atvikið hafi ekki áhrif á rekstrarleyfi staðarins.
Hann leggur áherslu á að mikilvægt sé að lögreglan gæti meðalhófs við eftirlit, eins og því sem var viðhaft síðustu helgi. Óþarfi sé fyrir fjölmennt lið lögreglunnar í fullum skrúða að koma inn með látum til þess að skoða skilríki.
/frimg/1/29/32/1293273.jpg)
Auðvelt að falsa skilríki
„Megingagnrýni lögreglunnar hefur lotið að því að það hafi farið gestir inn á staðinn sem voru ekki komnir með aldur,“ segir Sveinn en bætir við að svo virðist sem að auðvelt sé að falsa skilríki sem erfitt sé að sjá í gegnum.
Segir hann umbjóðanda sinn hafa leitað ráða hjá lögreglu um hvernig hægt sé að bregðast við þessu.
„Fyrir það fyrsta hafa menn engan áhuga á því að fá einhverja kúnna þarna inn sem eru ekki komnir með aldur,“ segir Sveinn Andri.
„Sá aldurshópur – hann verslar lítið og lítið á honum að græða,“ bætir hann við.
