Missti stjórn á bifreið sinni í hálku

Ökumaður missti stjórn á bifreið sinni í hálku á Möðrudalsöræfum um hádegi á laugardag. Endaði bifreiðin utan vegar. Voru tvö flutt á heilsugæslustöðina á Vopnafirði með smávægileg meiðsl. 

Þetta kemur fram í færslu lögreglunnar á Austurlandi sem hvetur ökumenn til þess að vera á varðbergi nú þegar akstursskilyrði fara smátt og smátt versnandi með lækkandi sól og hættu á hálkublettum hér og þar. 

Þau tvö sem í slysinu lentu á laugardag fóru heim að skoðun lokinni og voru ekki talin alvarlega slösuð. 

Í færslu lögreglunnar segir að fjöldi skráðra umferðarslysa í fjórðungnum fyrstu níu mánuði ársins sé svipaður og á sama tímabili í fyrra. 

Þá voru skráð þrjátíu og fimm slys en þrjátíu og fjögur nú. Umferð hefur aukist lítillega á Austurlandi frá í fyrra samkvæmt tölum frá Vegagerðinni.

• Blogga um frétt