„Hvert sjálfs­víg hef­ur gáru­áhrif á fjöl­marga hópa“

Uppfæra á sjálfsvígsforvarnaáætlun með það fyrir sjónum að aðgerðir hennar tengist gildandi stefnu og aðgerðaáætlun í geðheilbrigðismálum, auk lýðheilsu- og heilbrigðisstefnu.

Willum Þór Þórsson heilbrigðisráðherra hefur falið starfshóp skipaðan níu einstaklingum að koma með tillögu að uppfærðri áætlun. Á hópurinn að skila tillögunni fyrir lok ágúst. 

Aðgerðirnar sem hópurinn leggur til skulu vera kostnaðarmetnar og skilgreindar út frá tilgangi, ábyrgð, samstarfsaðilum og samfélagsáhrifum. 

Þetta kemur fram í tilkynningu heilbrigðisráðuneytisins.

„Margt áunnist“

„Hvert sjálfsvíg hefur gáruáhrif á fjölmarga hópa og tap samfélagsins er mikið. Á grundvelli gildandi aðgerðaáætlunar hefur margt áunnist og mjög gott starf verið unnið,“ er haft eftir heilbrigðisráðherra í tilkynningu ráðuneytisins.

„Frá þeim tíma sem aðgerðaáætlunin var sett hefur margt breyst bæði í þjóðfélaginu og í sjálfsvígsforvarnavísindum. Brýnt er því að uppfæra aðgerðirnar, aðlaga að nútímanum og nýjustu áherslum á þessu sviði, svo þær skili sem mestum árangri fyrir fólkið í landinu.“

Geta kallað til sérfræðinga

Starfshópurinn hefur heimild til að kalla til sín aðra sérfræðinga og eftir þörfum fulltrúa frá hagsmunasamtökum, mennta- og barnamálaráðuneyti, félags- og vinnumarkaðsráðuneyti, dómsmálaráðuneyti og Sambandi íslenskra sveitarfélaga.

Hópinn skipa:

• Guðrún Jóna Guðlaugsdóttir, verkefnastjóri sjálfsvígsforvarna hjá embætti landlæknis, formaður
• Ingibjörg Sveinsdóttir, heilbrigðisráðuneyti
• Sigrún Sigurðardóttir, prófessor við heilbrigðisvísindasvið Háskólans á Akureyri, fyrir hönd Geðhjálpar
• Liv Anna Gunnell, sálfræðingur, Þróunarmiðstöð íslenskrar heilsugæslu,
• Jóhanna María Eyjólfsdóttir, djákni, fagstjóri Sorgarmiðstöðvar
• Sigurður Páll Pálsson, geðlæknir, Landspítala
• Grétar Björnsson, félagsráðgjafi, fyrir hönd Hugarafls
• Ásta Ingibjörg Pétursdóttir, prestur
• Guðríður Haraldsdóttir, sálfræðingur, fyrir hönd Geðheilsumiðstöðvar barna

• Blogga um frétt