Mun færri börn nota TikTok og Snapchat

Meirihluti þátttakenda sagðist eyða miklum tíma á samfélagsmiðlum.
Meirihluti þátttakenda sagðist eyða miklum tíma á samfélagsmiðlum. Ljósmynd/Colourbox

Hlutfall barna á aldrinum 9 til 12 ára sem notar samfélagsmiðlana TikTok og Snapchat lækkar töluvert frá árinu 2021. Þá sögðust um 60% barna nota miðlana en það hlutfall er nú 36% fyrir TikTok og 41,5% fyrir Snapchat.

Fleiri stúlkur en strákar nota miðlana í þessum aldurshópi, en 13 ára aldurstakmark er á bæði TikTok og Snapchat.

Þetta kemur fram í nýrri skýrslu um tækjaeign og virkni á samfélagsmiðlum meðal grunn- og framhaldsskólanema á aldrinum 9 til 18 ára. Skýrslan er fyrsti hluti af sex og byggir á niðurstöðum könnunarinnar „Börn og netmiðlar“ sem Menntavísindastofnun framkvæmdi fyrir Fjölmiðlanefnd í 53 grunnskólum og 25 framhaldsskólum, að því er segir í tilkynningu frá Fjölmiðlanefnd.

Þetta er í annað sinn sem Fjölmiðlanefnd, í samstarfi við Menntavísindastofnun, birtir niðurstöður slíkrar umfangsmikillar könnunar.

Tafla/Fjölmiðlanefnd

Hlutfall stráka og stelpna sem eiga sinn eigin farsíma er nokkuð jafnt. Mestur munur á snjalltækjaeign stráka og stelpna felur í sér eign á leikjatölvum. Rúmlega helmingi fleiri strákar en stelpur segjast eiga sína eigin leikjatölvu. Þá er einnig hærra hlutfall stráka sem segjast eiga sitt eigið sjónvarp.

YouTube á toppnum

YouTube er algengasti samfélagsmiðillinn sem nemendur á aldrinum 4.-7. bekk nota. Google og Roblox koma þar á eftir. Snapchat, YouTube og TikTok eru þeir miðlar sem flestir nemendur í 8. til 10. bekk segjast nota. Heldur færri í þeim aldurshópi nota Roblox en í yngsta hópnum, að því er kemur fram í skýrslunni. 

YouTube.
YouTube. AFP

Á framhaldsskólastigi eru Instagram, Snapchat og TikTok þeir miðlar sem flestir nemendur nefna. YouTube er sá netmiðill sem lendir í fjórða sæti.

Meðal yngsta aldurshópsins (4.-7. bekk) er hátt hlutfall notenda Facebook, Instagram, Snapchat, TikTok og YouTube með sinn eigin aðgang á miðlunum þrátt fyrir að aldurstakmörk þeirra séu 13 ára.

Sjá eftir deilingum á samfélagsmiðlum 

Langflestir þátttakendur á unglinga- og framhaldsskólastigi segjast sammála því að hafa mikið samband við vini sína á samfélagsmiðlum. Einnig telur meirihluti þátttakenda að þeir eyði miklum tíma á samfélagsmiðlum.

Maður heldur á síma með lógói TikTok.
Maður heldur á síma með lógói TikTok. AFP/Antonin UTZ

Um fjórðungur þátttakenda á unglingastigi (24%) hefur séð eftir því sem þeir hafa deilt á samfélagsmiðlum en hlutfallið meðal framhaldsskólanema er nokkuð hærra eða 42%.

Skoða hluti sem hægt er að kaupa 

Langflestir í 6. bekk og eldri kaupa sjaldnar en mánaðarlega eða aldrei neitt á netinu. Tæpur helmingur nemenda á unglinga- og framhaldsskólastigi segist skoða hluti sem hægt er að kaupa á netinu vikulega eða oftar.

Fleiri stelpur setja „læk“ eða hjarta daglega

Ekki er umtalsverður munur milli stráka og stelpna hvað varðar að leita upplýsinga með leitarvélum eins og Google daglega eða setja inn athugasemd á samfélagsmiðlum. Hins vegar eru aðeins fleiri stelpur en strákar sem setja „læk“ eða hjarta daglega við færslur annarra á samfélagsmiðlum.

Instagram.
Instagram. AFP/Lionel Bonaventure

Í 6. bekk og eldri er algengara meðal stráka en stelpna að vera daglega í áhugamannahópum á netinu. Sárafáir strákar og stelpur kaupa hluti daglega á netinu eða um 1%. Svipað hlutfall stráka og stelpna á unglingastigi (15%) skoða hluti sem þau geta keypt á netinu daglega.

Nota ChatGPT til að leysa skólaverkefni

Spurt var út í þekkingu og notkun á snjallmenninu ChatGPT. Athygli vekur að mun fleiri strákar en stelpur þekkja til ChatGPT en munurinn minnkar með hækkandi aldri.

AFP/Marco Bertorello

Meðal nemenda á unglingastigi er 38% munur á strákum og stelpum sem þekkja til snjallmennisins, þ.e. um sjö af tíu strákum þekkja til ChatGPT samanborið við þrjár af hverjum tíu stelpum. Sama hlutfall stráka og stelpna (19%) sem þekkja til snjallmennisins segjast hafa notað það til að leysa verkefni fyrir skólann.

Í framhaldsskóla þekkja 90% stráka til snjallmennisins en tæpur helmingur þeirra (46%) segist hafa notað það til að leysa skólaverkefni. Sjö af hverjum tíu stelpum (69%) þekkja ChatGPT og 40% þeirra segjast hafa notað það til að leysa skólaverkefni.

mbl.is
Fleira áhugavert
Fleira áhugavert