Toppstöðin í Elliðaárdal komin í söluferli

Gildandi fasteignamat Toppstöðvarinnar tæpar 775 milljónir króna.
Gildandi fasteignamat Toppstöðvarinnar tæpar 775 milljónir króna. Friðrik Tryggvason

Borgarráð hefur heimilað söluferli á Toppstöðinni, varastöð Landsvirkjunar við Rafstöðvarveg í Elliðaárdal.

Þetta kemur fram í tilkynningu frá Reykjavíkurborg.

Toppstöðin var tekin í notkun árið 1948. Þá var hún olíu- og kolakynnt varaflstöð, reist með Marshallaðstoðinni.

Árið 2008 afsalaði Landsvirkjun Toppstöðinni til Reykjavíkurborgar og hefur húsið þjónað tilgangi frumkvöðlaseturs.

Umsóknir metnar út frá fleiru en kaupverði

Með hliðsjón af sögulegu mikilvægi hússins og staðsetningu verður ekki um beina sölu að ræða heldur samkeppni þar sem kaupverð mun hafa 75% vægi, segir í tilkynningunni.

Að öðru leyti verða umsóknir metnar eftir þáttum eins og hugmyndafræði, tengslum við Elliðaárdalinn, hönnun og samráði við nærumhverfi auk þess sem horft verður til fyrirhugaðrar starfsemi í húsnæðinu. Þá mun mat á kauptilboðum einnig byggja á hugmyndum bjóðenda um sjálfbærni og kolefnisfótspor.

Reykjavíkurborg áskilur sér rétt til að taka hvaða tilboði sem er eða hafna öllum tilboðum.

Viðræður um samstarf hafa ekki skilað árangri

Þrisvar hefur verið auglýst eftir samstarfsaðilum um uppbyggingu Toppstöðvarinnar undir jaðaríþróttir en viðræður hafa ekki skilað niðurstöðu.

Hefur því verið ákveðið að auglýsa eftir áhugasömum aðilum til að kaupa eignina.

mbl.is
Fleira áhugavert
Fleira áhugavert