Dómsalur gæti nýst ríkisstjórn

Svo gæti farið að ríkisstjórn Íslands fengi fundaraðstöðu í gamla hæstaréttarhúsinu við Lindargötu í Reykjavík. Er þetta meðal þess sem fram kemur hjá Bjarna Benediktssyni forsætisráðherra í viðtali við Morgunblaðið en að undanförnu hafa framkvæmdir staðið yfir í Ráðherrabústaðnum við Tjarnargötu.

Frétt af mbl.is

Betra aðgengi og brunavarnir

„Verkefnið mun taka allt þetta ár og við höfum þess vegna hætt að funda í Ráðherrabústaðnum,“ segir Bjarni meðal annars en gamla hæstaréttarhúsið hefur verið notað að hluta til sem æfingahúsnæði fyrir Þjóðleikhúsið.

„Húsið verður tekið í gegn að innan en búið er að steina húsið að utan og laga glugga. Hugmyndin er að þar sé salur sem ríkisstjórnin geti fundað í og geti sömuleiðis verið móttökusalur,“ segir Bjarni og bendir á að með þessu mætti draga úr umfangi byggingar sem til stendur að byggja á baklóð Stjórnarráðsins.

Gerum okkur dagamun

Í dag eru 80 ár síðan Ísland varð lýðveldi og er rætt við Bjarna um tímamótin. „Ég hef alla tíð haldið upp á 17. júní og ég geri ráð fyrir að það eigi við um alla Íslendinga. Við eigum að gera okkur sérstakan dagamun þegar afmælishátíð ber að garði. Á 80 ára afmælinu er ástæða til að horfa með þakklæti til þeirra sem börðust fyrir fullveldinu og stóðu að stofnun lýðveldisins,“ segir Bjarni Benediktsson, forsætisráðherra og formaður Sjálfstæðisflokksins.

Nánari umfjöllun er að finna í Morgunblaðinu í dag.