Fjölskyldur, ungir og aldraðir í rútunni sem valt

Ögmundur Skarphéðinsson, ræðismaður Tékklands á Íslandi, segir betur hafa farið en á horfðist eftir að rúta valt í Öxnadal á föstudag. Hann hrósar hjálparliðum í hástert og segir þá hafa komið myndarlega að björgunaraðgerðum.

Frétt af mbl.is

Tveimur er haldið sofandi eftir rútuslysið

Hann segir ferðamennina afar þakkláta þeim sem komu þeim til bjargar, en hópurinn hafi verið margslunginn: „Ungt fólk, eldra fólk og fjölskyldur, þannig að þetta var mjög dreifður hópur eins og ég skil það.“

Flytja þurfti fimm með þyrlu og sjúkraflugvélum á gjörgæsludeild Landspítalans. Halda þurfti tveimur sofandi í öndunarvél en þeir voru sagðir vera með stöðug lífsmörk. Aðrir fimm farþegar voru lagðir inn á Sjúkrahúsið á Akureyri, en alls voru 22 tékkneskir ferðamenn í rútunni.

Sendiherra Tékklands í Noregi var fyrir tilviljun staddur á landinu.

„Svo heppilega vildi til að bæði sendiherra Tékklands í Noregi og fulltrúi sendiráðsins voru staddir hér,“ segir Ögmundur, en sendiherra Tékklands í Noregi gegnir líka hlutverki sendiherra á Íslandi þótt bækistöðvarnar séu í Osló.

„Þetta hjálpaði mjög mikið til. Þau greiddu úr tungumálaerfiðleikum og hlutum sem sneru að persónulegum upplýsingum,“ segir hann og bætir við að Tékkar búsettir á Íslandi hafi boðið fram krafta sína.

Að sögn Ögmundar flugu níu frá landinu í gær og hann staðfesti að til hefði staðið að hópurinn færi frá landinu í gær. Flestir þeirra sem eftir eru séu ferðamenn sem þurftu að dvelja á spítala vegna slyssins og aðstandendur þeirra.