Hlutfall útskrifaðra nýnema aldrei mælst hærra

Brautskráningarhlutfall – hlutfall nýnema sem hefur útskrifast – í framhaldsskólum hefur ekki mælst hærra í tölum Hagstofunnar síðan árið 1995.

Rúm 64% þeirra sem voru nýnemar á framhaldsskólastigi árið 2018 höfðu útskrifast árið 2022. 

„Brotthvarf úr námi hefur verið nálægt 20% síðustu þrjú ár en 20,3% nýnema haustið 2018 höfðu hætt námi fjórum árum síðar,“ segir í tilkynningu Hagstofunnar.

„Rúmlega 15% nýnema haustsins 2018 voru enn í námi án þess að hafa útskrifast fjórum árum síðar og hefur það hlutfall ekki verið lægra.“

Frétt af mbl.is

Aldrei fleiri brautskráðir af háskólastigi

Hæsta hlutfallið hjá Íslendingum fæddum erlendis

Brautskráningarhlutfall mældist hæst, eða 80%, hjá nemendum sem voru fæddir erlendis en eiga foreldra sem báðir fæddust á Íslandi.

Alls höfðu 67% nýnema ársins 2018, með engan erlendan bakgrunn, útskrifast árið 2022.

64% þeirra sem fæddust erlendis og eiga eitt foreldri sem fæddist erlendis hafa lokið framhaldsskóla. 

Tæp 61% þeirra sem fæddust á Íslandi en eiga foreldra sem báðir fæddust erlendis hafa útskrifast en 57% þeirra nemenda sem fæddust á Íslandi og eiga eitt foreldri fætt erlendis.

Frétt af mbl.is

Brotthvarf í framhaldsskólum fer minnkandi

Lægsta hlutfallið meðal innflytjenda

„Lægst var brautskráningarhlutfallið á meðal innflytjenda, þ.e. þeirra sem fæddust erlendis og eiga báða foreldra fædda erlendis, en tæplega 41% þeirra höfðu útskrifast fjórum árum eftir upphaf náms,“ segir í tilkynningunni.

Þar segir einnig að brautskráningarhlutfall hafi farið hækkandi á meðal innflytjenda en það sé enn mun lægra en á meðal nýnema með íslenskan bakgrunn.

• Blogga um frétt