13 sagt upp hjá ÁTVR: 4 boðið annað starf

Þrettán starfsmönnum var sagt upp hjá ÁTVR um mánaðamótin, en þar af var fjórum boðið annað starf. Um er að ræða sjö starfsmenn á skrifstofu og sex í verslunum. Þetta staðfestir Sigrún Ósk Sigurðardóttir, aðstoðarforstjóri ÁTVR, í samtali við mbl.is.

Hún segir fjóra starfsmenn í verslunum hafa tíma til að hugsa sig um hvort þeir þiggi önnur störf hjá fyrirtækinu, en níu hætti störfum.

Uppsagnirnar séu liður í tilmælum stjórnvalda um aukna hagræðingu í rekstri ríkisins og stofnana til að takast á við breytingar í ytra umhverfi.

Verslunarstjórum boðin staða verkstjóra 

Tvær vínbúðir á höfuðborgarsvæðinu fara undir stjórn stærri vínbúða og verður staða verslunarstjóra í þeim lögð niður. Verslunarstjórum þeirra vínbúða hefur verið boðið að taka við stöðu verkstjóra, en Sigrún segir slíkt fyrirkomulag hafa tíðkast í Smáralind í nokkur ár.

Þá hafa stöður aðstoðarverslunarstjóra í fjórum vínbúðum verið lagðar niður.

„Stærstur hluti af þessu er breyting á skrifstofu en það eru 480 starfsmenn hjá ÁTVR í heildina,“ segir Sigrún, sem segir að ekki sé um fjölmennar uppsagnir að ræða þegar á heildina er litið. „En það er alltaf erfitt að segja upp fólki,“ bætir hún við.

• Blogga um frétt