Innlent | Morgunblaðið | 9.11.2024 | 7:40

Sósíalistar á leið inn á þing

Sanna Magdalena Mörtudóttir, oddviti sósíalista í Reykjavík suður, í Spursmálum í síðasta mánuði. mbl.is

Sósíalistaflokkurinn fengi 6,7% atkvæða skv. skoðanakönnun Prósents fyrir Morgunblaðið í vikunni. Það er ríflega helmings fylgisaukning frá liðinni viku og marktæk breyting, sem myndi færa flokknum fjögur þingsæti.

Hins vegar er fylgi Vinstri-grænna enn blýfast í 2,6% og að óbreyttu fellur flokkurinn af þingi.

Fylgisbreytingar annarra eru innan vikmarka fyrri viku, mismiklar þó. Sjálfstæðisflokkurinn mælist með aðeins 12,3% en var síðast með 14,1%.

Frétt af mbl.is

Tekjuöflun nauðsynleg

Flokkur fólksins bætir við sig

Samfylking lækkar áfram flugið, fær 21,6% en hafði 26,3% fyrir mánuði.

Fylgi Viðreisnar dvín einnig eftir hástökk í liðinni viku. Það er nú 17,1% en hafði áður farið úr 15,0% í 18,5%.

Fylgi Framsóknar haggast ekki og mælist 5,8% þriðju vikuna í röð, en var vikurnar á undan í rétt rúmum 6%.

Flokkur fólksins bætir óverulega við sig, er í 11,5%, en sé litið aftur sést að hann hefur þokast um rúmt prósentustig undanfarnar fimm vikur.

Sú viðbót hjá Flokki fólksins er hófleg út af fyrir sig, en á hinn bóginn er hneigðin öll á eina leið; flokkurinn er að bæta við sig. Rétt eins og hneigðin hjá Samfylkingu er á hinn veginn.

Frétt af mbl.is

Víðir gerir upp mistök frá covid-tímanum

Samfylking gæti farið í 18%

Af slíkum hreyfingum má draga ályktanir óháð því hversu nákvæmar mælingarnar eru, en vikmörk eru há, 4-5 prósentustig hjá fylgismeiri flokkunum.

Haldist þær hneigðir gæti Samfylking farið niður í 18% í lok mánaðar en Flokkur fólksins í rúm 12%. Meiri og óvissari hreyfing er á borgaralegu flokkunum þremur, en ekki minni spenna um hvort Sósíalistar nýti skriðþungann frá þessari viku og sópi vinstra hornið betur.