Innlent | mbl | 30.11.2024 | 8:15 | Uppfært 14:36

Óvissustig á Möðrudalsöræfum og á Vopnafjarðarheiði

Mokstur stendur yfir víða um land. mbl.is/Þorgeir

Snjóþekja eða hálka er á flestum leiðum á Norðausturlandi. Gul veðurviðvörun er í gildi vegnar hríðar á Norðurlandi eystra, Austurlandi að Glettingi, Austfjörðum, Suðausturlandi og Ströndum og norðurlandi vestra.

Í hugleiðingum veðurfræðings á Veðurstofu Ísland segir að norðaustan- og norðanátt verður ríkjandi í dag, víða allhvass eða hvass vindur.

Búast má við snjókomu og skafrenningi á austurhelmingi landsins með erfiðum akstursskilyrðum og líkur á að færð spillist.

Spáð er él norðvestantil á landinu, en þurrt suðvestanlands. Frost verður á bilinu 0 til 7 stig.

Frétt af mbl.is

„Versta spáin virðist vera að rætast“

Reynt að halda úti hefðbundnum mokstri

Á umferdin.is segir að snjóþekja eða hálka sé á flestum leiðum á Norðurlandi og Norðausturlandi.

Óvissustig er í gildi á Möðrudalsöræfum og Vopnafjarðarheiði. Reynt verður að halda úti hefðbundnum mokstri þrátt fyrir óvissustigið.

Varðandi færð á Austurlandi segir að snjóþekja sé á Fjarðarheiði en þæfingur á Fagradal, á Hólmahálsi, á milli Breiðdalsvíkur og Djúpavogs og milli Hafnar og Þvottár.

Þungfært er í Norðfirði, í Heiðarenda og í Jökulsárhlíð. Þá er ófært er milli Fáskrúðsfjarðar og Breiðdalsvíkur sem og milli Djúpavogs og Þvottár en mokstur stendur yfir.

Á Suðausturlandi er víðast hvar þæfingur eða snjóþekja á vegum en mokstur stendur yfir. Ófært er á Mýrdalssandi.

Þá er snjóþekja, hálka eða hálkublettir undir Eyjafjöllum og einhver éljagangur.

Á Vesturlandi og Vestfjörðum er hálka eða hálkublettir eru á nokkrum leiðum. Mjög hvasst er undir Hafnarfjalli og snjóþekja er norður í Árneshrepp.