Hlutu styrk upp á 3,5 milljarða: Einn sá stærsti sem Ísland hefur fengið

Umhverfisstofnun, ásamt 22 samstarfsaðilum, hefur hlotið um 3,5 milljarða króna styrk frá Evrópusambandinu til að vinna að fjölbreyttum verkefnum til að flýta fyrir og bæta innleiðingu vatnaáætlunar á Íslandi.

Verkefnið ber yfirskriftina LIFE ICEWATER og er styrkurinn einn sá stærsti sem Ísland hefur fengið, að því er segir í tilkynningu frá stofnuninni. 

Ætlað að auka þekkingu á notkun, eiginleikum og ástandi vatns á Íslandi

Þar segir að markmið verkefnisins sé að auka þekkingu á notkun, eiginleikum og ástandi vatns á Íslandi. Einnig að tryggja fumlausa og samhæfða stjórnsýslu þegar komi að vatnamálum. Enn fremur að bæta vatnsgæði, til dæmis með úrbótum í fráveitu og hreinsun á fráveituvatni. Loks að fræða almenning og hagaðila um mikilvægi vatns.

„Umfang verkefnanna sem samstarfshópurinn hefur sett saman er samtals um 5,8 milljarðar króna. LIFE áætlun Evrópusambandsins styrkir verkefnið um 60% eða samtals um 3,5 milljarða sem dreifast á samstarfshópinn og verða verkefnin unnin á árunum 2025-2030,“ segir í tilkynningunni. 

Nánari upplýsingar er að finna hér.

• Blogga um frétt