Nýir þingmenn verða meirihluti þingmanna á Alþingi á komandi þingi, en samtals 33 af 63 þingmönnum eru nýir þingmenn. Þó hafa fimm þeirra áður setið á þingi sem aðalmenn, en voru þó ekki á síðasta þingi.

Nýliðarnir eru nú mættir niður á þing þar sem þeir fá kynningu á hagnýtum atriðum sem varða allt frá tækjabúnaði og aðgengi að Alþingi yfir í starfskjör þeirra. Þá verður einnig farið yfir helstu atriði varðandi þingstörfin.

Þetta er mesta nýliðun á Alþingi í 65 ár, en næstmesta nýliðunin var í kosningunum 2016, þá voru nýir þingmenn 32. Þrisvar sinnum hafa 27 nýir þingmenn hlotið kosningu, árin 2009, 2013 og 2021.

Eftir hádegi var nýliðunum svo fylgt um Alþingishúsið og þeim sýnd aðstaðan þar.